Հուլիսի 30-ին «Seaside Startup Summit Armenia 2026»-ի շրջանակում անցկացվեց «Mining Innovation Summit»-ը՝ Հայաստանում հանքարդյունաբերության, ժամանակակից տեխնոլոգիաների և նորարարությունների համադրմանն ուղղված ամենամասշտաբային միջոցառումը։
Մի վայրում հավաքվել էին ոլորտների առաջատար ներկայացուցիչները՝ կիսվելու փորձով, նոր գաղափարներով ու լուծումներով, գտնելու համագործակցության նոր եզրեր և ձևավորելու երկխոսություն, որը կարող է վերածվել իրական նախագծերի։
Ժամանակակից հանքարդյունաբերությունը վաղուց միայն արդյունահանման մասին չէ։ Այն թվայնացման, ավտոմատացման, նորարարությունների և բարձր տեխնոլոգիաների խոշոր պատվիրատու ու ակտիվ սպառող է։
«Mining Innovation Summit»-ը ցույց տվեց նաև հակառակ ուղղությամբ հնարավորությունը․ հանքարդյունաբերությունը կարող է դառնալ ոչ միայն տեխնոլոգիաների սպառող, այլև բարձր տեխնոլոգիական լուծումների ու նորարարությունների զարգացման կարևոր գործընկեր և պատվիրատու։
Այս միջոցառումը ևս մեկ անգամ ընդգծեց՝ երբ ավանդական ոլորտների փորձն ու նորարարական տեխնոլոգիաները միավորվում են նույն հարթակում, ստեղծվում են նոր` ավելի արդյունավետ, մրցունակ և կայուն հնարավորություններ։