«Ուսանողական ամառ - 2026» ծրագրի շրջանակում Քաջարանի համայնքապետարանի նախաձեռնությամբ քաջարանցի ուսանողները ճանաչողական այց կատարեցին Զանգեզուրի պղնձամոլիբդենային կոմբինատի հանքավայր։
Այցի ընթացքում ուսանողները հնարավորություն ունեցան իրենց ծնողների աշխատավայրում լինել, տեղում ծանոթանալ հանքարդյունաբերության առանձնահատկություններին, տեսնել իրականացվող աշխատանքն ու պատկերացում կազմել այն մեծ գործընթացների մասին, որոնք ամեն օր ապահովում են կոմբինատի գործունեությունը։ Նրանք ծանոթացան նաև ԶՊՄԿ-ի տեխնիկական վերազինման և արտադրական ենթակառուցվածքների զարգացման ընթացքին, տեսան, թե ինչպես են ժամանակակից տեխնոլոգիաներն ու նորարարական լուծումները ներդրվում արտադրական գործընթացներում։
Նման այցերը երիտասարդների համար ոչ միայն ճանաչողական, այլև մասնագիտական կարևոր փորձառություն են․ դրանք հնարավորություն են տալիս իրականում բացահայտել Հայաստանի խոշորագույն գործատուներից մեկի աշխատանքը, պատկերացում կազմել հանքարդյունաբերական ոլորտի զարգացման մասին և տեսնել մասնագիտական առաջընթացի այն հնարավորությունները, որոնք ապագայում կարող են իրենց ավելի ամուր կապել հայրենի համայնքի հետ։
