Ամեն տարի ապրիլի առաջին կիրակին նշվում է որպես երկրաբանների մասնագիտական տոն՝ խորհրդանշելով դաշտային աշխատանքների ակտիվացման շրջանը։
ԶՊՄԿ-ն մշտապես ձգտում է մեծացնել հետաքրքրությունը երկրաբանության նկատմամբ՝ կազմակերպելով տարաբնույթ միջոցառումներ հատկապես մասնագիտական օրվա առթիվ։
Այս տարի կոմբինատի փորձառու երկրաբանները հանդիպեցին Կապանի, Քաջարանի և տեղի գյուղական համայնքների մի շարք դպրոցականների հետ՝ ներկայացնելով երկրաբանության ամբողջ հմայքն ու կարևորությունը։ Պատանիների հետ հանդիպման ժամանակ առաջնային էր «Երկաբանությունն ամենուր է և պահանջված» համոզմունքը, որը ներկայացվում էր մոտիվացնող հիմնավորումներով ու ոլորտի վերաբերյալ հետաքրքրական մանրամասներով։
«Երկրաբանության ոլորտը բազմաշերտ է, գրավիչ, ՏՏ ոլորտից բարձր վարձատրվող ու երբեք չհնացող»,- իրենց խոսքում ընդգծում էին ոլորտի փորձառու մասնագետները՝ «ԶՊՄԿ» ՓԲԸ տեխնիկական տնօրեն Արման Վարդանյանը և «ԶՊՄԿ» ՓԲԸ երկրաբանահետախուզական ծառայության պետ Արման Հայրապետյանը։
Հանդիպման ավարտին աշակերտների համար կազմակերպվեց շրջայց, ինչը հնարավորություն տվեց գործնականում ծանոթանալ Հայաստանի թիվ մեկ հարկատու ձեռնարկության աշխատանքներին և առավել լայն պատկերացում կազմել ոլորտի մասին։
Ինչպես Ա.Վարդանյանն է նշում, ԶՊՄԿ-ն սերտ համագործակցում է մայր բուհի հետ՝ խրախուսելով երկրաբանի մասնագիտության ընտրությունը։ Համատեղ ջանքերով փորձում են վերականգնել դիմորդների քանակը՝ նախաձեռնելով մոտիվացնող բազմաբնույթ միջոցառումներ։ Անցյալ տարի առաջին անգամ կազմակերպվել է դաշտային պրակտիկա Սյունիքի մարզում, առանձնապես՝ Քաջարանի հանքավայրում համալսարանական ապագա երկաբանների և աշխարհագետների համար։